Хаант тахилч

Иймд амьд чулуу мэт болсон та нар ч
Есүс Христээр дамжуулан Бурханд тааламжит, сүнслэг тахилуудыг өргөх
ариун тахилч болохын тулд
сүнслэг байшин болон баригдагтун.
1Петр 2:5

Харин та нар бол сонгогдсон угсаа, хаант тахилч нар,
ариун үндэстэн, Бурханы эзэмшлийн ард түмэн юм.
Ингэснээр харанхуйгаас та нарыг Өөрийн гайхамшигт гэрэл уруу
дуудсан Түүний давуу чанаруудыг та нар тунхаглах юм.
1Петр 2:9

Энэ өгүүлэл нь уншигчийг Судар дахь дараах асуултыг судлахад дуудна: долоо хоног бүр номлодог ганц пастор байх ёстой юу, эсвэл номлол нь бүх хүмүүсээс (Ариун Сүнс хүмүүсийг ярихад удирдсанаар) гарах ёстой юу? Дараах Судрын хэсгийг бодолцоно уу:

Ах дүү нар аа, тэгвэл яах вэ?
Та нарыг цуглах үед хүн тус бүрд
дуулал,
сургаал,
хэл,
илчлэлт,
тайлбар байдаг.
Бүх юм босголтын төлөө болог.
1Коринт 14:26

Сүмийг хүн бүрийн хувь нэмрээр босгох нь зорилго болохыг маш тодорхой харж болно (1Коринт 14:5,16). Энэ нь Паулын Ефесийн сүмд бичсэн захидалд дахин харагдана:

Тэр заримыг нь элч,
заримыг нь эш үзүүлэгч,
заримыг нь сайн мэдээг тунхаглагч,
заримыг нь хоньчин ба
багш болгожээ,

ариун хүмүүсийг бэлтгэж
үйлчлэлийн ажилд,
Христийн биеийг байгуулахын тулд юм.
Ефес 4:11-12

Бурхан сүм нь Бурханы «олон талт нигүүлслээр» (1Петр 4:10) босгогдохын тулд өөр өөр хүмүүст өөр өөр бэлэг чадвар өгсөн юм. Ганц хүн Бурханы бүх төрлийн бэлгийг эзэмшдэггүй. Тиймээс, ганц хүн Христийн биеийг босгох бүх ажлыг хийж чадахгүй. Паул биеийн хамтдаа ажиллах шаардлагыг 1Коринт 12-т дахин онцолдог:

Учир нь бие бол ганц эрхтэн бус, харин олон эрхтэнтэй.
Хэрэв бүхэл бие нүд байсан бол сонсгол нь хаана байх байсан бэ?
Хэрэв бүхэл бие сонсгол байсан бол
үнэрлэх мэдрэмж нь хаана байх билээ?
1Коринт 12:14,17

Нэг хүн бүгдийг удирдаж байгаа нь ямар асуудалтай вэ?

Би зарим нэг зүйлийг чуулганд бичсэн.
Харин тэдний дунд тэргүүн болохыг дурлагч Диотреф
биднийг хүлээж авахгүй байгаа юм.
3Иохан 9

Энд бид тэргүүн байхыг дуртай, бүлгийг захирахыг дуртай нэг хүн, Диотрефийн жишээг харж байна. Ганц хүн бүхэл сүмийг удирдах нь аюултай. Энэ нь хяналт, тэнцвэрт байдалд орон зай үлдээдэггүй. Тэр байтугай Америкийн Нэгдсэн Улсын үндсэн хуулийг бичсэн хүмүүс ч байгууллагаа хамтдаа засгийг удирдах ахлагчдын зөвлөл, буюу хүмүүсийн бүлгийн санаан дээр загварчилсан юм. Петрийн сүмийн ахлагчдад өгсөн заавар нь: «Хонин сүргийг хариул» (1Петр 5:2) байсан ч, «өөрсдөд чинь даалгасан хүмүүсийг ноёлох бус, харин хонин сүрэгтээ үлгэр дуурайл болон хариул» (1Петр 5:3) гэсэн юм.

Цуглах гол зорилго юу вэ?

Бие биеэ хайр болон сайн үйлсэд
хөхүүлэн урамшуулахад анхааръя.
Зарим хүмүүсийн зуршил болсон шиг
хамтран цуглахаа болилгүй, харин
бие биеэ зоригжуулъя;
нөгөө өдөр ойртож буйг харах тусам
улам ихээр.
Еврей 10:24-25

Бид долоо хоног бүр цуглаж уулзах шалтгаан нь (1) талх хуваах (Үйлс 2:42), (2) залбирал, (3) элч нарын сургаал, (4) бие биеэ хайр болон сайн үйлсэд хөхүүлэн урамшуулах (Еврей 10:24-25), (5) дуулал, магтуу, сүнслэг дуунуудаар бие биедээ заах, сануулах явдал гэдгийг санах ёстой:

Христийн үг та нарын дотор бялхам оршиж,
бие биедээ заан, бие биеэ сэнхрүүлж бүх мэргэн ухаанаар,
Бурханд хандаж зүрхэндээ баяртайгаар дуулж,
сүнслэг дуу, магтуу, дууллуудаар байг.
Колоссай 3:16

Ганц хүн номлох нь буруу юу?

Үгүй. Заримдаа хэн нэгэн тодорхой бүс нутгийн сүмд ирж, үг хэлж байсан бололтой. Үүний нэг тод жишээ нь Паулын Троас сүмд номлосон явдал юм. Тэд долоо хоногийн эхний өдөр талх хуваахаар цуглаж, Паул «шөнө дунд болтол яриагаа үргэлжлүүлсэн» (Үйлс 20:7).

Гэвч ганц хүн долоо хоног бүр ганцаараа номлож, бие биеэ урамшуулах, зоригжуулах, эсвэл бусдаас сонсох боломж байхгүй бол, бие нь Бурханы захирсан ёсоор босгогдож чадахгүй. «Бүү мэхлэгд. Бурхан элэг доог болохгүй. Юу гэвэл хүн юу тарьснаа л хурааж авдаг» (Галат 6:7). Бид тарьсанаа хураана. Хэрэв бид Бурханы Үгийн сургаалыг анхааралтай дагаж мөрдөхгүй бол, сүм зовох болно. Сүмийн жинхэнэ өсөлт нь Түүний захирсан ёсоор хийхэд захирагдахаас л гардаг (Иошуа 1:8, Дуулал 37:23, 1Коринт 14:40).

Төгсгөлийн уриалга

Бидний залбирал бол чи бичигдсэн зүйлийг бодолцож, өдөр бүр Судрыг эрж хайж, эдгээр зүйл үнэн эсэхийг шалгасан Берейчүүдийн адил байх явдал юм:

Харин тэндхийнхэн Тесалоникийн хүмүүсийг бодвол уужим сэтгэлтэй байсан бөгөөд
тэд үгийг дуртайяа хүлээн авч,
эдгээр нь үнэн эсэхийг мэдэхийн тулд
Судрыг өдөр бүр нягтлан үзэж байлаа.
Үйлс 17:11

Миний юу хэлж буйг эргэцүүлэн бод.
Учир нь Эзэн чамд алив бүхний дотор ойлголтыг өгнө.
2Тимот 2:7